’n KKNK-projek, ondersteun deur die Jannie Mouton-stigting, Het Jan Marais Nationale Fonds en die Wes-Kaapse departement van kultuursake en sport.

In 2026 vier ons nie net die 30ste KKNK op Oudtshoorn nie, maar ook vyf jaar van Karoo Kaarte – ’n projek wat stadig maar seker die manier verander het waarop plattelandse geskiedenisse gedokumenteer, gedeel en herverbeel word. Wat begin het as ’n klein eksperiment in gemeenskapsvertelling, het sedertdien ontwikkel in ’n bekroonde model vir gemeenskapsgedrewe kulturele programsamestelling. Danksy samewerking en sorg kon Karoo Kaarte oor dié vyf jaar sitkamers betree, deur familiealbums blaai en te hore kom van herinneringe van toeka se tyd, waarmee ’n lewende argief saam met die mense van Oudtshoorn opgebou is.

Vir hierdie mylpaal keer die span terug na plaaslike fotografie om die uitruil van herinneringe, beelde, kennis en sorg tussen gemeenskappe – dikwels lank geskei deur ras, geografie en toegang – sigbaar te maak.

Die Karoo Kaarte-program vir 2026 aktiveer plaaslike fotografiese versamelings wat in gesprek met Oudtshoorn se veelvlakkige verlede tree: Van intieme familie-argiewe en ’n plaaslike fotografiese ateljee tot die kragtige beeld-erfenis van Saamstaan, die anti-apartheid-gemeenskapskoerant wat swart en bruin lewens gedokumenteer het. Foto’s, mondelinge geskiedenisse en bydraes wat oor vyf jaar as deel van Karoo Kaarte versamel is, sluit naatloos hierby aan.