2001 was die jaar waarin Jak de Priester sy eerste groot treffer, “Sally Williams Nougat”, geskryf het. Die daaropvolgende jaar wen hy die ATKV-Crescendo-kompetisie en stel sy eerste album bekend. Dit is ook die jaar waarin hy sy eerste vertoning na die KKNK bring. Dit is nou 25 jaar later – met talle liedjies, televisieprogramme en optredes later. Liedjies soos die temalied van Binnelanders, wat hom ’n huishoudelike naam in Suid-Afrika gemaak het. Hierdie jaar vier hy dit met hierdie trefferbelaaide konsert en ’n boek met sy liedjies.